Бо хүн Сергей Пюрбю аттыг Улусчу чогаадылга бажыңынга ТР чурттап турар чоннарның съездизи болуп эрткен. Аңаа республиканың 19 муниципалдыг тургузугларындан 38 нацияларның 249 делегаттар киришкеннер. Оларның аразында эр улус 130 кижи, херээжен делегаттар – 140. Байырлыг ажыдыышкын үезинде Кызылда чурттап турар хөй санныг янзы-бүрү нацияның төлээлериниң ажы-төлү боттарының национал танцыларын делегаттарга бараалгатканнар.

ТР Чазааның даргазы Шолбан Кара-оол, Тываның Дээди Хуралының даргазы Каң-оол Даваа байыр чедириишкинин чугаалааннар. Съездиниң ажылын ТР Чазааның даргазының оралакчызы Дина Оюн удурткан. Кызыл хоорай Чагыргазының баштыңы Виктор Тунев илеткел кылган.

Ооң илеткелинден алырга, Тывада 146 аңгы язы-сөөк чоннар чурттап турар; тыва, орус чоннардан аңгыда моолдар 2000 ажыг, кыдаттар 860, кыргыстар 800 ажыг дээш. Амгы үеде Тываже кээп турар чоннарның саны, үнүп турар чоннардан хөй бооп турар. Эдеринчи илеткелге эртемден, “Тывалар делегейиниң” удуртукчузу Каадыр-оол Алексей сөс алган. Ол элээн каш саналдарны киирген. Дараазында орус, саха-якут, алтай, моол, американ, африкан чурттакчыларның төлээлери байыр чедириишкиннин съездиниң киржикчилеринге кылганнар.

Съезд дараазында бодунуң шиитпирин хүлээп алган: ТР чоннарның Ассамблеязының Уставын хүлээп алыр, ТР Ассамблеязының чөвүлелиниң кежигүннерин бадылаар база национал-культура талазы-биле программаны ажылдап кылыр, ТР национал культуралыг автономиялар дугайында Хоойлунуң төлевилелин кылыр ажылчын бөлүктү тургузар дээн ышкаш. Съезд бодунуң ажылын 3 шак иштинде доозупкан.