Январь 13-те Россияның парлалга Хүнү. Россияның Журналистер эвилелиниң Тыва салбыры бо чылын профессионал байырлалын бир өскээр демдеглээр дээн. Ол дугайында тыва Журналистерниң эвилелиниң даргазы Хеймер-оол Ооржак дыңнаткан. Мооң мурнунда чылдарда бо байырлалды солуннар, радио, телевидение журналистери болгаш парлалга ажылдакчылары демдеглеп турганнар. Парлалга ажылдакчыларындан хомудал кирип эгелээн: байырлал парлалганың бооп турар, а радио-тележурналистер мында кол черни ээлеп эгелээннер. Оларның улуг байырлалы – чылдың-на май 7-де демдеглеп турар Радио хүнү болгай. Ынчангаш Тываның Журналистер эвилели, бо чылдан эгелеп, январь 13-те чүгле солуннар болгаш республиканың типография ажылдакчылары база Тываның ном үндүрер чери демдеглээр деп шиитпирлээн.       

Бо байырлалдың кол кезээ – ам 9 дугаар бооп турар “Чонар-даш демир-үжүк” деп мөөрейниң түңнелдерин үндүрери. Мөөрейниң комиссиязы база маңаа чаа чүүлдү киирген. Мөөрей тыва, орус дылдыг солуннар аразында аңгы түңнелдер үндүрер. Шак-ла ындыг түңнел кожууннар солуннарының аразында база ийи дылга чардынган болур. “Чонар-даш демир-үжүкте” киирген ажылдар жанрлар аразы-биле база аңгыланып турар болгай: очерктер, аналитиктиг чүүлдер, интервьюлар дээш. Республика солуннарының аразында Пенсия фондузунуң, Үндүрүг албан черлериниң, школа назыны четпээннер Төвүнүң боттарының солуннары база парлаттынып турар, олар бо байырлалга база киржирлер. Тыва республикага Парлалга хүнүнүң байырлыг кезээ январь 13-те Кызылда бичии театрга 17.00 шакта эгелээр. А январь 15-те тыва парлалганың журналистери “Субедей” комплекстиг спорт залынга дошка конькилеп, ТР Чазааның командазы-биле янзы-бүрү спортчу оюннарга маргыжарлар.