Тыва альпинистер ээлчеглиг, беш дугаар экспедициядан төрээн Тывазынче бо хүннерде чанып келгеннер. Австралия – талыгыр дип, Тывадан Москва – Гонкгонг – Сидней аразы 20 000 км чедип турар. Австралияда ам көктүг чай, агаарның чылыы 25-30 градус. Ооң эң бедик шыпшыы болур Косцюшко дагга чедир ам-даа 500 километрни демир-орук-биле, автобус-биле, такси-биле база чадаг чедер болган. Февраль 23-те тыва команда дүъш үезинде 2228 м Косцюшконуң шыпшыынче үне бергеннер. Орук ара олар чаа географтыг ажыдыышкыны кылганнар. 2000 м бедикте бо оран Тыва-биле кара олчаан болган. Ол-ла ногаан шаттар, даштар, оът-сиген, ымыраа-сээк, талыгыр каътташкак тайгалар, даглар, дүдүскөк, ак-көк дээр.      

Талыгыр Австралияның эң бедик шыпшыынга Маадыр-оол Ховалыг, Вячеслав Севек, Марианна Сурунчап – олар Тываның, Россияның, МЧС-тиң, Орус география ниитилелиниң, “Чаңгыс демниг Россияның”, Кызыл хоорайның, Тываның күрүне университединиң туктарын, “Тыва Арат Республиканың 90 чылы” деп пөсте бижимелди, “Российский писатель” солунну, республика чурттакчыларының адын салган кадактарны болгаш өске-даа сүлделерни шыпшыкка ак-көк дээр адаанга киискиткеннер.        

Орус география ниитилелиниң президентизи Сергей Шойгунуң даалгазы-биле бо экспедиция дугайында 2 шактың видеокинозун тырттырганнар. Ол ажыл Москвага география ниитилелинге дужааттынган.      

Бо хүннерде Тываның ак-көк, сарыг, ала тугу Чер бөмбүрзээниң кижи чурттап турар шупту 6 диптеринге киискээн бооп турар: Европаның, Африканың, Мурнуу Американың, Соңгу Американың, Австралияның болгаш Азияның. Азияның база бир бедик шыпшыы болур Ленин сүүрүнче бистиң альпинистеривис 2006 чылда четкен болгай. Ам чүгле кижи чурттавайн турар Антарктида шыпшыында Тыва Республиканың тугу киискивээн. Ол сорулга тыва альпинистерниң мурнунда дээрзи чугаа чок.