Тываның массалыг информация чепсектериниң аразында  чаа сеткүүл немешкен. Республикада  чаңгыс уруглар  солуну “Сылдысчыгаш”- тың  кол  редактору Александр Шоюннуң  болгаш редакцияның чогаадыкчы коллективиниң  эгелээшкини - биле “Алдын - Кушкаш” деп  999 кезектиг чаа тускай бичии уругларга  таарыштыр палаан сеткүүлүнүң бирги үндүрүлгези чырыкче үнген. 

"Алдын - Кушкаш” сеткүүлдү бирги ужудуушкунунче ТР-ниң Чазааның даргазы Шолбан Кара-оол, Кызыл хоорайның мэри Владислав Ховалыг, делегейниң дириг эртинези, Улустуңуң чогаалчызы Монгуш Кенин-Лопсан болгаш тыва театрның билдингир артистери  арамайлап, узун оруу ак, номчукчулары хөй, оларга ажык - дузалыг, өөредиглиг болурун күзээннер.

“Алдын - Кушкаш” - тың  баштайгы өңнүг арынын  чалгыннарын херипкен  куштуң чуруу каастаан. Тоолзуг маадыр  сеткүүлдүң  ады боорундан аңгыда, уругларның  онза - солун, бүзүрелдиг өңнүү апаары чугаажок. “Алдын - Кушкашта” ыры - шүлүктерни, чечен чугааларны, тоолдарны,  чалыы номчукчуларының чураан чуруктарын  болгаш сонуургактарга  тывызыктар,бодалгаларны    парлаан.  Ылаңгыя, “Алдын - Кушкаш”- деп тоолду комикстер кылдыр чуруп, көргүскени тыва парлалгада чаа чүүл бооп турар.  

“Алдын - Кушкаш” сеткүүл  чедиишкинниг боор дээрзинге кандыг - даа чигзиниг чок. Чүге дизе Тывада “Сылдысчыгаш”  солуннуң редакциязы  доктаамал хөй санныг номчукчуларының сонуургалын чаалап алган, хөй чылдарда арга - дуржулгалыг,  уруглар парлалгазында хыын тыва берген.