Эргим, хүндүлүг номчукчу! 

Бистиң республикада «Сылдысчыгаш» уруглар солуну катап тургустунгаш, 20 ажыг чылдар эртип турарын билир силер. Бо үениң дургузунда чаштар солунунуң үндүрүлгелеринге дыка хөй уруглар боттарының баштайгы шенелде чогаалдарын, материалдарын, чураан чуруктарын, эш-өөрү-биле чоруткан кыска интервьюларын, материалдарын хөйү-биле парладып келген. Ол дээрге уругларның солунунга ынааның, аңаа сонуургалының, ону боттарының чиңгине парлалга органы кылдыр санап турарының бадыткалы-дыр.

Ооң-биле чергелештир делегейде билдингир уруглар чогаалчыларының чогаалдарындан аңгыда, чогаал бижип чоруур ада-иелерниң, кырган-ава, кырган-ачаларның, акы-угбаларның уругларга хамаарыштыр бижээн чогаалдарын «Сылдысчыгаш» чырыдарын база утпайн турар. «Сылдысчыгашта» кол черни «Коңгулуур» аттыг уруг­ларга чечен чогаал арыны, «Шыяан ам» деп тоолдар, «Бойдузувус» деп долгандыр турар бойдус хүрээлели, «Сүзүк» деп шажын, «Бодан, тып, бодап каг», «Сылдыска чагаалар», «Светофор» деп булуңнар ээлеп турар.

Бөгүнгү үндүрүлгеден эгелээш, «Шынның» суббота үндүрүлгелеринге «Уругларга булуң» деп рубриканы эгелээр-дир бис. Аңаа уруглар солунунуң «Коңгулуур» чечен чогаал арынынга үнүп турган билдингир уруглар чогаалчыларының «алдын үүжелеринден», уругларның бижээни материал­дары болгаш эки үнелелди алган чогаалдарындан эгелээш, уругларга өөредиглиг, угаадыглыг материалдар парлаттынар. «Шынның» уругларга тураскааткан бо булуңунга кандыг материалдарны болгаш чогаалдарны парлаза экил, ол талазы-биле боттарыңарның саналыңарны киирип болур силер, эргим «Шынның» номчукчузу.

Фото Чимизы Ламажаа