«Төгерик столга» чаа тургустунуп турар башкы институдунуң башкылары, хоорайның школалар директорлары болгаш ясли-садтарның эргелекчилери-биле саазын кырынга быжыктырып, керээлерни чарары-биле демнежип ажылдаарының дугайында сайгарылганы кылган. Башкыларны дүвүредип турар айтырыглар-ла хөй. Школа, сад дээрге башкы институдунуң студентилериниң практиказын эрттирер чери болганда, кады дугуржулгалар ыяавыла херек апаар. Институт башкыларының билиин бедидер курстарны эрттирерин боттарынга хүлээнип ап турар. А школа башкылары боттарының методиктиг арга-сүмезин институт башкыларынга база дамчыдып, практиктиг кичээлдерни эрттирер болган. Институт тускай башкы кадрларны белеткеп турар болганда, катап база практика шактарын узадырын база чугаалашкан.

Тываның күрүне университединде башкы институду ажылдап эгелээнден бээр ийи ай чедип турар. Ооң кол угланыышкыны келир үениң бедик билиг-мергежилдиг башкыларын белеткээри. Амгы үеде институттуң башкыларының мурнунда салдынып турар сорулгаларының бирээзи инститтунуң башкы кадрларын белеткээри, материал-техниктиг базазын чаартыры.

Институттуң негелдези-биле ыяавыла эртем чадалыг башкылар ажылдаар болганда, аспирантураже уруглар сады, школалардан беш чылдан эвээш эвес стажтыг башкыларны өөредип чорударының дугайында база маңаа чугаалашкан. Школа болгаш уруглар садтарының өөредилге программаларын чаартып, эде көөрүнден аңгыда, чаа өөредилгениң тыва дыл кырында номнарын база кады демнежип тургаш үндүрерин «төгерик столга» чүүлдүг деп санаан.